Karl Pümpin

Us der alemannische Wikipedia, der freie Dialäkt-Enzyklopedy

Keine Version gesichtet.

Selbstportrait von Karl Pümpin

Dr Karl Pümpin isch am 2. April 1907 z`Gälterchinde uf d Wält cho; und gschtorbe am 9. April 1975 ebefalls z`Gälterchinde im Baselbiet. Är isch e Buur gsi wo no gmolt het. Dorum hei si ym au „Der malende Bauer“ gseit.

[ändere] Sis Läbe

Dr Karl Pümpin isch uf em Buurehof vom Vatter ufgwachse. Är isch in d`Primarschuel z`Gälterchinde, d`Bezirksschuel z`Böckte und die landwirtschaftlichi Schuel z`Lieschtel gange. Drufabe isch är ins Wälsche greist, zum ene Schryner, um sis Französisch z`vertiefe. `S mit Holz schaffe het em so gfalle, dass är schpöter uf sym Buurehof e chlyni Schrynerwärchstatt, mit Maschine zum `s Holz z`bearbeite, yboue het; so het är chönne sälber Bilderräme härschtelle. Är het d`Gawallery-Regrutteschuel im Schache z`Aarau gmacht und isch im zweute Wältchrieg an dr Grenze im Bärner-Jura schtazioniert gsi. 1933 het är d`Buuredochter Rosa Marti vom Himmelsgrund z`Häfelfinge ghürotet. Vier Chinder hei si zäme gha: `S Annerös, `s Margrit, dr Karl und `s Lotti. En Änkel vo ihm, dr Fredy Schär (Soon vom Annarös), tritt als Kabarettischt uff.

[ändere] Dr Wärdegang

Dr Pümpi Kari het gärn de Moler us dr Umgäbig bim Mole zuegluegt und mit ene diskutiert. Är het verschideni Fachbüecher gchauft und schtudiert. Am beschte hei ym d`Impressionischte gfalle. So het är sich `s bildnerische Gschtalte autodidaktisch bybrocht. Scho in de junge Joore isch är ame mit sim Vetter Fritz Pümpin in die freyi Natur use gange um zäme z`mole. Wärend `s Mole bim Fritz zu sim Bruef worden isch het dr Karl müese dr Buurehof vom Vatter übernee und so isch `s halt bi ym nume ä lonendi Näbebeschäftigung blibe.

Wenns ame gege d`Wienecht gangen isch het är sini Bilder im Wageschopf zur Schau gschtellt . Vil Lüt si ame cho luege und hei au gchauft. An de Usschtellige vo dr Baselbieter Kunschtförderig het är ebefalls erfolgrich usgschtellt. Dört het dr Karl Pümpin dr Titel „Der malende Bauer“ übercho.

Är het meischtens mit Ölfarb uf Lynwand gmolt, mit Pinsel und Spachtel. Es git au e paar Cholezeichnige vo ym. Für d`Fasnecht het är öpe im Uftrag Helge und Kulisse mit Wasserfarb gmolt.

Sy Wunsch, dr Läbensobe mit Mole z`verbringe isch ym wäge syner Chranket und sym früeje Tod mit 68i nid erfüllt worde.

[ändere] extärni Verbindige

[ändere] Lueg au

Pümpin

Vun "http://als.wikipedia.org/wiki/Karl_P%C3%BCmpin"